2016年3月28日 星期一

櫻花蝦。米餅

2016-3-25 made


昨晚整米飯漢堡時煲多咗飯 原本想今晚做炒飯食埋佢
點知有朋友約食tea (4點先開始食)-_-#
食完都5點幾差不多6點先分手回家。
仲邊有胃放得落啲隔夜飯吖!
如果倒咗佢又好嘥,再留多一日又怕太硬唔食得 最終都係要掉咗佢,索性跟 台灣友試整呢個 仙貝(即係 米餅)反正廚房材料齊哂:目

睇完台灣友嘅食譜後 見佢喺調味方面 好似重手咗啲,所以我只參考沒有跟隨,我用咗自己嘅做法同用具去做,嘻嘻!

先將隔夜米飯+糯米粉同調味料落機打勻 然後洒上櫻花蝦 海苔後壓成薄片
放入我的V仔內 用'呢絲'板模烤2.5分鐘
完成後 放涼 入盒。
*可能近期太潮濕了,第二日食有點un un哋,我即刻將米餅再用V仔回烤1分鐘將米飯嘅水份烤乾放涼後再入回盒中。
第三日食都仲好脆呢* ^0^
But 味道方便都係咸咗啲,等我改一改我嘅配方做多次 成功後再分享食譜!

2016年3月25日 星期五

Rice Burger 米漢堡(食譜)

2016-3-24 made
我同老細喜歡食晏時討論吓晚餐食咩好。
實情係由我問 >今晚想食咩呀 ?
佢就比意見話 > 不如煮乜煮乜煮乜吖!我聽完後 > 多數否決咗佢提意
其實我一邊聽就一邊自己諗緊煮咩好,佢嘅提意永遠都係只供參考 好少錄用,哈哈哈哈!
今次也不例外,因為我已經諗倒整咩 嘿嘿。
前一日喺吉豬超市掃咗啲食材都未煮哂,仲有啲鮮牛肉(樣樣淨番少少)同埋細半煲湯,
所以要一鋪過清哂佢!
今晚就食米煩(飯)漢堡啦(好耐冇整喇)
回家後即刻洗米煲飯,摷埋啲小圓形矽膠模出嚟整漢堡飯^0^配埋少少煙肉蘑菇炒露荀,煎釀雞翼+隔夜湯。又可以清埋啲廚餘 真開心 呵呵!

洋蔥牛肉米飯漢堡食譜 ~ hanhan
材料:
A.熟米飯      兩碗
   壽司醋      半湯匙
   糖              一茶匙
B. 洋蔥          半個
    鮮牛肉      200g
    日or 韓式燒肉汁  兩湯匙
     水            半碗
做法:
1. 將煲好米飯加壽司醋 糖 拌勻 將米飯,不'入圓形平底模內壓實實的然後攤凍
2. 落少許油燒熱鑊然後將米飯漢堡放入煎香脆兩面 上碟先!
3. 落少許油炒香洋蔥,然後落牛肉一起炒至牛肉7成熟,落醬油炒勻 再落水蓋上蓋轉慢火焗至洋蔥軟淋 收汁熄火。
在米飯漢堡上唧上蛋黃醬再加入炒好洋蔥牛肉變成漢堡,上碟 食得😊

後記
朋友們見我整咗呢個米飯漢堡 以為我睇咗某飲食節目介紹了一間米漢堡專門店而跟佢整。
其實真係佢哋唔講我都唔知原來有間咁嘅食店,米漢堡我都唔係第一次整 以往都整過了(可能太耐了 所以冇人記得)除了米漢堡 我仲整過米pizza 嘅呢!

2016年3月21日 星期一

泰式鴨肉湯河

2016-3-20 home made
今日陪老細落咗去'鴨記'遊蕩,諗住蕩完後順便去街市買海鮮整晚餐
點知去到街市 見好多檔都賣得七七八八 淨番啲魚毛 蝦仔 (買唔落手),正煩惱買咩整晚餐好嘅時候 途經一檔賣滷水鴨嘅店鋪,老細即刻話》啲鴨睇落唔錯喎 買1/4 試吓囉!
(即時電燈着咗!)都好喎,雪柜仲有半樽泰式湯底 再唔用就過期喇!
一於用埋佢整個泰式鴨肉湯河^^
買完滷水鴨 即刻飛車落埋九龍城 泰國街買 啲肉丸串 金不換 肥嘟嘟芽菜 豬紅 等等 。
今晚呢餐都算簡單 因為全部都係買現食, 只係加少少工就搞掂,一碗美味嘅泰式鴨肉湯河 誕生喇 ~ 嘿嘿

2016年3月18日 星期五

Long time no do ~ Double cheese cake


2016-3-17 made
數數手指 都有好耐 好耐冇整過蛋糕 曲奇了
呢個Double Cheese Cake 去年已經想整(材料都買齊哂,可惜手殘未好 唔敢過份勞動隻手)
彩呢幾個月密密去做推拿後已見好轉,雖然未能十足痊癒 但都有七成。
所以近排又心思思 手痕痕 開始做啲輕易小食 甜品止吓痕(真係天生'妹仔'命)^^
不過今次整呢個蛋糕都算多工序,首先要焗個蛋糕底,然後再做一層Baked cream cheese 後入冰格雪凍4小時後加上一層 cheese Mousse,再雪一晚 第二日再打啲忌廉抺在蛋糕面層與周邊 再灑上海綿蛋糕碎就完成。
蛋糕完成後雙手真係有啲酸痛(又要去比人推推 鬆鬆先):P






2016年3月15日 星期二

白色情人節 ~ 櫻花奶凍(食譜)

2016-3-14 made
原來今日係日本人嘅白色情人節(喺fb 見人提起先記得)
我整呢個'櫻花奶凍'只係有咁啱得咁橋
因為今日約咗我的家人們去食飯 諗住整啲甜品同大家分享
醒起早前買咗包'鹽漬櫻花'放喺雪柜未用,一於又玩吓花先!
去年用櫻花整咗個'水信玄餅'比家人試,今次就轉玩第二款
櫻花奶凍^^
比我喺柜底摷到一包心型杯模(天生購物狂 買買埋埋唔少嘢收埋以備不時之需)哈哈!

係係好靚呢?呵呵
(自大狂又病發喇)^0^


出埋個食比大家 有興趣嘅可以試吓跟住整吖!
不過希望撻咗食譜嘅網友轉載後註明出自何人何處,雖然我出食譜係真想同愛好煮食嘅網友分享,但都唔想去遊遊蕩蕩時發現一啲鍾意'欺世盜名'嘅 無恥之徒用她人心血 受讚領功囉!


櫻花奶凍食譜 ~ hanhan

鹽漬櫻花  1包

Part 1. 底層 白色
3.6牛奶    1000ml
淡忌廉       450g
魚膠粉      20g
砂 糖         80g

Part 2. 面層 透明
魚膠粉      12g
砂糖          30g
熱水          160ml
凍開水      200ml

做法:
1. 用食用水浸洗去除花上鹽份,然後再過2次水後浸開花瓣備用
2. 將part 1 材料倒入鍋中用小火慢煮至糖 魚膠粉完全溶化(其間要不停慢搞拌 以免燶底)
3. 將2.過篩後放涼然後倒入杯模2/3滿放雪柜雪至凝固
4. 將part 2 魚膠粉+凍水後用熱水坐溶,糖+熱水拌勻後倒入魚膠水內拌勻-過篩 -放涼 備用
5. 將雪至凝固嘅奶凍取出,將浸好櫻花放上杯模中再倒入魚膠糖水 然後入雪柜雪至凝固即可。

*想有層次感睇落靚啲 可加多一層用士多啤梨奶做底層奶凍,中層做白色嘅奶凍,面層櫻花透明啫喱*

2016年3月11日 星期五

2016-3-10 親友飯聚 ~大廚小館

姑奶一家4口又到日本滑雪 順道回港探親
今次老細個姨生女 仲帶埋 Peter 仔返嚟遊玩!
我哋更係要熱情地招呼吓佢啦,嘿嘿
所以今晚專登帶哋去九龍城 叫雞 '仆嘢' ^0^

大家咪心邪啦,我哋係去九龍城 唔係 九龍塘呀,哈哈。

因為九龍城 「大廚小館 」出名食懷舊菜 其中一款'乞衣雞'上次姑奶回港已經想試 可惜此菜式要早一日預訂 所以上次食唔倒,今次就預早book定位訂埋'乞衣雞'。

佢哋嘅招牌送酒小吃都有好多款,其中呢款 椒鹽靈芝菇 
係我哋嘅至愛,每次落去飯聚都必點。
仲有街知巷聞 嘅 招版 杏汁豬肺湯
唔鍾意杏仁茶 杏仁豆腐花嘅我 反而超愛嘅此湯
懷舊生炒骨
坊間一般只會用醋精 糖 嚟整生炒骨,但佢哋加埋 山渣 ,所以食落酸甜而不'確'喉
鐵板野菌豆腐 Yummy
 招牌生炒糯米飯
粒粒分明 香軟 正
上湯浸菜苗
好大碗 份量比一般食店多呢!
主角出場喇,登 登 登登
廚師用上塘泥包住 所以烤焗後發出嘅氣味有點特別 嘿嘿。
有朋自遠方來 當然要比鬼仔 試吓大庭廣眾 '仆嘢'啦:P
睇佢仆得幾開心 哈哈 哈哈!
鬼仔仆完嘢後 服務員就拎番隻雞去開封 解剖後再放回枱比我哋品嚐,撥開雞肉 看見雞肚內釀滿了木耳 紅棗 金針 雞肝 雞腎等。
即試,雞肉入口軟 淋 仲帶有好香嘅雞肝味(因為啲雞肝已經溶化了更滲透到雞肉內)真係巧巧味呢!

食完豐富特式晚餐後就到甜品出場
今次我又整咗最拿手&去到邊都大受歡迎嘅broken glass jello

最後多謝 姑奶嘅手信&平安藥<3
年尾再見喇^^

2016年3月8日 星期二

2016-3-8 婦女節速遞 ~ 盛田屋

一直用開日本 盛田屋 豆腐面膜(從代購購入都要$120)而家香港嘅'屈人寺'都有售,不過價錢同我早前幫襯嘅代購差不多⋯
最近發現'面書'嘅'db 美麗'做特價 3盒優惠裝只係$299(即係唔使$100一盒,好抵啊)
即刻click 入去look look 
發現仲有好多面膜 之類做緊特價 仲免運費添啊^0^
我4號晚落單 8號早上已經送到上門(快吖)!
打開箱一看 除咗我買果set 豆腐面膜+一set 兩支去角質啫喱&洗顏粉 外 仲送咗好多試用裝呢*0*
今次網購真係好抵,貨價平咗 又免運費 仲有咁多嘢送喎 真係有排用呀^^